தூத்துக்குடி மாவட்டம் கங்கைகொண்டான் அருகே உள்ள கே.கைலாஷ்புரம் கிராமத்தில் மாணவர்களின் கல்வி நேரம் பாதிக்காத வகையில் இரவு நேரத்தில் கலை வகுப்பு நடத்தப்பட்டு வருகிறது. கல்வியுடன் கலையையும் இணைத்து மாணவர்களின் திறமைகளை வளர்க்கும் நோக்கில் முனைவர் சகா. சங்கர் தொடர்ந்து பல்வேறு பயிற்சிகளை வழங்கி வருகிறார்.
இன்றைய காலகட்டத்தில் மாணவர்கள் செல்போன், தொலைக்காட்சி மற்றும் யூடியூப் போன்றவற்றில் அதிக நேரத்தை செலவிடும் நிலை அதிகரித்து வருகிறது. இதிலிருந்து மாணவர்களின் கவனத்தை மாற்றி, அவர்களுக்குள் இருக்கும் கலைத்திறமைகளை வெளிக்கொண்டு வருவதுடன், நேரத்தை பயனுள்ள வகையில் பயன்படுத்தச் செய்வதே இந்த கலை வகுப்பின் முக்கிய நோக்கமாக உள்ளது.
“முதலில் வீட்டுப்பாடம்... பின்னர் கலைப்பாடம்!”
இந்த கலை வகுப்பில் சேர்ந்து பயிற்சி பெறுவதற்கும் ஒரு முக்கிய விதிமுறை உள்ளது. மாணவர்கள் தினமும் தங்களது வீட்டுப்பாடங்களை முழுமையாக படித்து முடித்த பின்னரே கலை வகுப்பில் கலந்து கொள்ள முடியும். இதன் மூலம் கல்விக்கு முக்கியத்துவம் அளித்துக் கொண்டே கலைத்திறனையும் வளர்க்கும் சூழல் உருவாக்கப்பட்டுள்ளது.
மாணவர்களுடன் ஆசிரியர்கள், பயிற்சி ஆசிரியர்கள் மற்றும் தனியார் நிறுவனங்களில் பணியாற்றும் பெண்களும் ஆர்வத்துடன் கலந்து கொண்டு பல்வேறு கலைகளை கற்று வருகின்றனர். வயது வித்தியாசமின்றி கலை மீது ஆர்வம் கொண்ட அனைவரையும் இணைத்து, கலை வழியாக சமூகத்தில் நல்ல மாற்றத்தை ஏற்படுத்தும் முயற்சியாக இந்த பயணம் அமைந்துள்ளது.
“கலையும் கல்வியும் வழி” என்ற நோக்கத்துடன் சகா கலைக்குழு தொடர்ந்து தனது பயணத்தை மேற்கொண்டு வருகிறது. முடிந்தவரை அனைத்து கிராமங்களுக்கும் சென்று கலைப் பயிற்சிகளை வழங்கி, மாணவர்கள் மற்றும் பொதுமக்களிடம் கலை ஆர்வத்தை ஏற்படுத்துவதே குழுவின் இலக்காக உள்ளது.
முனைவர் சகா. சங்கர் தொடர்ந்து பல்வேறு பயிற்சிகளை அளித்து வரும் நிலையில், கே.கைலாஷ்புரம் கிராமத்தில் நடைபெறும் இந்த இரவு நேர கலை வகுப்பு, மாணவர்களை செல்போன் மோகத்தில் இருந்து கலை உலகை நோக்கி அழைத்துச் செல்லும் பாராட்டுக்குரிய முன்னெடுப்பாக அமைந்துள்ளது.
