தமிழக முதல்வர் விஜய் குறித்து பொதுக்கூட்டத்தில் சர்ச்சைக்குரிய வகையில் பேசியதாக எழுந்த புகாரின் அடிப்படையில், விளாத்திகுளம் தொகுதி திமுக எம்எல்ஏ மார்க்கண்டேயனை போலீசார் கைது செய்துள்ளனர். தூத்துக்குடி மாவட்டம் விளாத்திகுளத்தில் சனிக்கிழமை திமுக சார்பில் நடைபெற்ற பொதுக்கூட்டத்தில் கலந்து கொண்டு உரையாற்றிய மார்க்கண்டேயன், தமிழக முதல்வர் விஜய் குறித்து கடுமையான விமர்சனங்களை முன்வைத்து பேசியதாக கூறப்படுகிறது.
இந்தப் பேச்சு தொடர்பாக முதல்வர் குறித்து அவதூறாகவும், அவமதிக்கும் வகையிலும் பேசியதாக புகார் அளிக்கப்பட்டதைத் தொடர்ந்து, விளாத்திகுளம் தாலுகா காவல் நிலைய போலீசார் வழக்குப்பதிவு செய்து விசாரணை மேற்கொண்டனர். விசாரணையின் தொடர்ச்சியாக, மார்க்கண்டேயன் வசிக்கும் வீட்டிற்குச் சென்ற போலீசார் அவரை கைது செய்து, சட்டப்படியான நடவடிக்கைகளை மேற்கொண்டு வருகின்றனர்.
இந்தக் கைது சம்பவத்தைத் தொடர்ந்து விளாத்திகுளம் மற்றும் அதன் சுற்றுவட்டாரப் பகுதிகளில் பாதுகாப்பு முன்னெச்சரிக்கை நடவடிக்கையாக பலத்த போலீஸ் பாதுகாப்பு போடப்பட்டுள்ளது. இதனால் அப்பகுதியில் பரபரப்பான சூழல் நிலவுகிறது. இந்த சம்பவம் அரசியல் வட்டாரங்களில் பரபரப்பை ஏற்படுத்தியுள்ள நிலையில், கைது தொடர்பான அடுத்தக்கட்ட சட்ட நடவடிக்கைகளை போலீசார் மேற்கொண்டு வருகின்றனர்.
