வீரபாண்டியன்பட்டினம் கோவில் திருவிழாவை முன்னிட்டு இன்று நடைபெற்ற திருப்பலியில், கத்தோலிக்க பாதிரியார் ஒருவரின் உரை அரசியல் சர்ச்சையை ஏற்படுத்தியுள்ளது. திருப்பலியில் பிரசங்கம் செய்த Fr. ரூபஸ் என்பவர், தமிழக வெற்றிக் கழகத் தலைவர் நடிகர் விஜய் குறித்து விமர்சனக் கருத்துகளை முன்வைத்ததாகக் கூறப்படுகிறது.
இந்த உரை, திட்டமிட்ட அரசியல் விமர்சனமாகவும் அவதூறாகவும் இருப்பதாகக் குற்றம்சாட்டிய தமிழக வெற்றிக் கழக (டிவிகே) வீரபாண்டியன்பட்டினம் பகுதி நிர்வாகிகள், கோவிலை அரசியல் மேடையாக பயன்படுத்தக் கூடாது எனக் கண்டனம் தெரிவித்தனர்.
இதனைத் தொடர்ந்து, டிவிகே (தமிழக வெற்றிக் கழகம்) தோழர்கள் வீரபாண்டியன்பட்டினம் பங்குத்தந்தை அருட்திரு. அலோய்சியஸ் அவர்களை நேரில் சந்தித்து தங்களின் எதிர்ப்பை பதிவு செய்தனர். திருப்பலி போன்ற மத நிகழ்வுகளில் அரசியல் பேசுவது தேவையற்றது என்றும், இது பொதுமக்கள் மத்தியில் குழப்பத்தை ஏற்படுத்தும் என்றும் அவர்கள் வலியுறுத்தினர்.
இதற்கு பதிலளித்த பங்குத்தந்தை அலோய்சியஸ், நடந்த சம்பவத்திற்கு வருத்தம் தெரிவித்ததுடன், சம்பந்தப்பட்ட பாதிரியார் Fr. ரூபஸ் உரை தொடர்பாக விளக்கம் அளித்து, வருத்தம் தெரிவிக்கும் வீடியோ ஒன்றை வெளியிடுவதாக உறுதி அளித்துள்ளதாகவும் தெரிவித்தார்.
மேலும், Fr. ரூபஸ் கல்வி நிறுவனத்தின் முதல்வராக உள்ள நிலையில், பொதுமேடைகளில் அரசியல் கருத்துகளை வெளிப்படுத்துவது சரியானதல்ல என்றும், இது மத அமைப்புகளின் மரியாதையை பாதிக்கும் என்றும் டிவிகே நிர்வாகிகள் தெரிவித்துள்ளனர். இந்த சம்பவம் குறித்து சமூக வலைதளங்களில் விவாதம் தீவிரமடைந்துள்ள நிலையில், மத நிகழ்வுகளில் அரசியல் தவிர்க்கப்பட வேண்டும் என்ற கோரிக்கை மீண்டும் வலுப்பெற்றுள்ளது.
